§ 1 Organisasjon
Namnet på forbundet er FO (Fellesorganisasjonen).
FO er medlem av Landsorganisasjonen i Noreg (LO).
FO er partipolitisk uavhengig.
§ 2 Formål
FO skal vere leiande arbeidstakarorganisasjon for barnevernspedagogar, sosionomar, vernepleiarar og velferdsvitarar. FO skal fremje løns- og arbeidsvilkåra til medlemmane, og vere leiande på helse- og sosialpolitikk, yrkesetikk og profesjonsfag.
FO skal:
- Arbeide for å betre løns- og arbeidsvilkåra til medlemmane.
- Arbeide for ei kontinuerleg utvikling av profesjonsfaga og utdanningane.
- Vere ein pådrivar i helse- og sosialpolitikk.
- Arbeide for å fremje den faglege og etiske standarden til medlemmane.
- Arbeide for eit solidarisk samfunn der grunnpilarane er likeverd, tryggleik og ein rett for alle til utdanning og arbeid.
- Kjempe for likestilling mellom kjønna.
- Kjempe mot alle former for rasisme, diskriminering, undertrykking og forfølging.
- Fremje samarbeid mellom kollegaer og organisasjonar på det helse- og sosialfaglege feltet i inn- og utland.
- Arbeide for ei fri og uavhengig fagrørsle.
- Synleggjere FO-profesjonane.
§ 3 Medlemskap
Vilkår for medlemskap:
- Fullført bachelor-/masterutdanning innanfor barnevern, sosialt arbeid, vernepleie og velferdsfag.
- Det kan bli gitt dispensasjon for søkjarar med likeverdige utdanningar. Dispensasjonssøknader blir behandla av arbeidsutvalet.
- Studentar ved godkjende utdanningsløp, jf. pkt. 1.
Medlemskategoriar:
- Yrkesaktive medlemmar.
- Ikkje-yrkesaktive medlemmar.
- B-medlemmar – yrkesaktive medlemmar (jf. pkt. 1 og 2 over) som arbeider i sektor/bransje/bedrift der forbundet ikkje har grunnlag for å opprette tariffavtale. Søknader om B-medlemskap blir behandla som i pkt. 2.
- Studentar ved godkjende utdanningsløp, jf. pkt. 1. Medlemmar som tek mastergrad eller anna vidareutdanning og har studiet som primær sysselsetjing.
- Pensjonistar/stønadsmottakarar.
Medlemmane pliktar å rette seg etter vedtektene og det yrkesetiske grunnlagsdokumentet til forbundet.
Personar som er medlemmar av rasistiske, nazistiske og/eller fascistiske organisasjonar, eller gir til kjenne at dei støttar desse, kan ikkje vere medlemmar av FO.
Ved flytting til utlandet får medlemmen kvilande rettar. Yrkesaktive medlemmar i utlandet betaler kontingent som B-medlem. Medlemmen høyrer framleis til avdelinga si.
